Монгол улсын Оюуны чадварын IQ төвөөс оюуны өндөр чадвартай сурагч, багачуудыг илрүүлэх, чадварыг нь баталгаажуулах, оюун ухааныг дээдлэн дэмжин хөгжүүлэх үзэл санааг түгээн дэлгэрүүлэх зорилгоор 2007-2008 оны хичээлийн жилээс эхлэн жил бүрийн намар, орон даяар “Сэтгэх чадварын намрын сорилго”-ыг тогтмол зохион байгуулж ирсэн. 
Орон даяар, жил бүр оюун сэтгэлгээний тодорхой төрөл-чадвараар, үнэ төлбөргүй зохион байгуулагддаг үндэсний хэмжээний тус уралдаанд оролцогчдын тоо болон гүйцэтгэлийн хувь жил ирэх бүр тасралтгүй нэмэгдэж, сурагчдын сэтгэх чадварт бодит өөрчлөлт гарч байгааг дурдахад таатай байна. 2019-2020 оны хичээлийн жилд зохион байгуулсан 12 дахь удаагийн сорилгод улсын хэмжээнд 68000 гаруй сурагч оролцож, сэтгэх чадвараа сорилоо.